Miss Ülrich

Hr Ulrich
Helgi Júlíus
Alda Lilja
Beta
Frú Sigríður
Erla
Hafrún
Helga
Hildur
Karen Inga
Lilja Sif
Linda
Lísa
María Sif
Massinn
MH túttur
Orri
Pétur Örn
Ragga Dan
Sara Natasha
Soffía
Thelma
Unnur
Vesturfarar

Amnesty
Skólinn
Blogger
Unifem
Unicef
Mogginn
ABC barnahjálp

Karen

...Mælir með:
Að vera mamma:D

...ER Að LESA:
-The Amazing Maurice and His Educated Rodents eftir Terry Pratchett. Köttur og rottuhópur öðlast skyndilega mikla greind og geta talað. Þau fá í lið með sér strákling sem spilar á flautu og fara að pretta peninga út úr fólki. Bráðskemmtilegt!!

Nýlegir póstar

It´s facebook...

Back to school...

What to say, what to say?

Eldri póstar

þriðjudagur, janúar 31, 2006

A typical day at the office!

Ég átti einn af ÞESSUM dögum í gær, það voru forföll í vinnunni svo að ég varð að vera tveggja manna maki, og get sagt ykkur að það er ekki eins skemmtilegt og það hljómar, undir lok dagsins var mér farið að líða eins og skítuga olnbogabarni Sýslumanns. Þegar ég sat í kjallaranum og horfði bitrum augum á skjölin sem ég átti að vera að vinna helltist örvæntingin yfir mig. "Nei, ég get ekki meir" öskraði ég af öllum kröftum. Þegar að svona er ástatt hjá manni er skrifstofan ekki besti staðurinn fyrir mann með öllum sínum tortímingartólum. Tannhvassar tengdamömmur, heftarar, stimplar og BRÉFAHNÍFAR! Glampandi, oddhvassir bréfahnífar.... ein eldsnögg stunga í miltað, brisið eða eitthvað annað líffæri sem ég nota lítið. Bara sárt í smástund og svo ertu frjáls, átt eftir að vakna í mjúku rúmi þar sem að hvítklætt fólk stjanar við þig og gerir á þér geðrannsóknir, heilbrigt fólk stingur sig nefnilega ekki í miltað með bréfahníf. En það er alveg þess virði, ekki satt???
Ég rankaði við mér með sólheimaglott á andlitunu, strjúkandi bréfahníf eins og hann væri kettlingur. "Heyrðu góða, taktu þér tak!! Þú ert starfsmaður íslenska ríkisins."
Ég fleygði frá mér bréfahnífunum, stóð upp úr stólnum og setti hendur á mjöðm. Vindurinn blés í hárinu á mér og á bak við mig blakti íslenski fáninn.

Ný gerð af ofurhetju!!
Hún á enga skikkju, hún hefur valdið til að senda símtal þitt til 10 mismunandi aðila sem allir gefa þér sitthvort svarið við spurningu þinni, hún getur stimplað þig til bana og rukkað þig svo fyrir það.
Hún er Starfsmaður hins opinbera.

Varist eftirlíkningar!

Eftir að hafa sýnt þetta veikleikamerki í vinnunni rauk ég í ræktina til að refsa líkamanum fyrir veikgeðja huga. Það var gaman og sérstaklega gaman að geta varla gengið. Ég tók meðal annars Súmóhnébeygjur sem ég vissi ekki að hétu súmóhnébeygjur (takk Svava)og nú ætla ég ekki að gera þær aftur því að tindilfættur blómálfur eins og ég á ekki að gera neitt sem líkir henni við feitan, sveittann japana í bleyju.
En svona var ógeðsmánudagurinn minn, vona að ykkar hafi verið betri.

Hér sjáið þið Tannhvassa tengdó, og með henni fylgir smá office húmor.
Alltaf þegar einhver spyr hvort maður eigi tannhvassa tengdó, þá svarar maður "Nei, mín er ósköp indæl" Hahahahahaha
Please kill me!

- Játaði Karen

mánudagur, janúar 30, 2006

Sinfully yours

Ég er orðin frekar þreytt á þessum endalausu hefðbundnu bloggklukksleikjum, þannig að ég ákvað að búa til minn eigin :)
Hann heitir Saklaus eða Syndug og það er alveg bannað að setja hann á bloggið sitt það er alveg nóg að ég sé á hraðferð til helvítis fyrir Guðlast það er alger óþarfi að taka ykkur öll með.

Við byrjum á því að fara yfir hversu mörg af Boðorðunum 10 ég hef beygt og janfvel brotið.

1.Ég er Drottinn Guð þinn, þú skalt ekki aðra guði hafa.
Hmmm já ég er búin að brjóta þetta boðrorð sundur og saman og hef margsinnis ákallað aðra vætti en þann eina sanna. Guð og Jesú eru samt alltaf uppáhalds!

2.Þú skalt ekki leggja nafn Drottinns Guðs þíns við hégóma.
Jesús minn ég er alltaf að brjóta þetta, í guðanna bænum!

3.Halda skaltu hvíldardaginn heilagann.
Einu skiptin sem ég hvíli mig á sunnudögum er þegar ég er þunn, annars eru þetta uppáhaldsdagarnir mínir til að þrífa. Og jafnvel til að vinna!

4.Heiðra skaltu föður þinn og móður.
Ég hef bara beyglað þetta boðorð aðeins, ekki alveg brotið það. Þó að pabbi minn heitinn hefði kannski verið á öðru máli ;)

5.Þú skalt ekki morð fremja.
Ok, ef að það er átt við mannslíf þá er ég saklaus hér, ég hef engann drepið en ég hef sent fullt af lífum yfir móðuna miklu, það er fjöldinn allur af kakkalökkum og pöddum sem að liggja í valnum eftir að hafa komist í kynni við Karen Ulrich.

6.Þú skalt ekki drýgja hór.
Búinn að brjóta þetta Beyond Recognition, og skemmt mér við það líka.

7.Þú skalt ekki stela.
Ég hef ítrekað náð mér í dót á netinu, en það er spurning um hvort að Guð sé á sama máli um að það teljist þjófnaður. Ég stal líka einhverju þegar ég var krakki en mamma lét mig skila því með tilheyrandi skömm þannig að það telst líklegast ekki með.

8.Þú skalt ekki bera ljúgvitni gegn nánunga þínum.
Guilty, er frekar leikin við að segja ósatt ef þið viljið heyra sannleikann híhí!

9.Þú skalt ekki girnast konu náunga þíns.
Ehemm næsta spurning takk!

10.Þú skalt ekki girnast hús náunga þíns né neitt sem honum heyrir til.
Úff, ég er svo sek hér, ég hef án efa margoft girnst það sem aðrir eiga!

Ok eftir fyrstu lotu er staðan 9/10 ég held að mér sé ekki viðbjargandi.

Þá er það næsti hluti leiksins okkar og það er að athuga hvað ég er sek af mörgum af Dauðsyndunum 7.

Látum okkur sjá!

1.Ofát
Úje ég var að drýgja þessa synd big time í gær, borðaði nammi þangað til ég varð veik!
2.Græðgi
Jebb, það er alltaf heillandi að eiga meira og meira, en mér til varnar þá er ég alveg til í að deila með mér.
3.Leti
Ekki spurning, hef eytt ansi mörgum klukkutímum með bossann gróinn fastann við sófann yfir sjónvarpinu.
4.Losti
Er afskaplega lostafull en ég hef réttlætingu á reiðum höndum.... Hafið þið hitt kærastann minn????
5.Hégómi
Ahhhhh uppáhaldssyndin mín og á vel við konu jafn forkunnarfagra og ég er, mér skilst að þetta sé uppáhaldssynd Kölska sem er gott þá höfum við eitthvað að tala um á meðan ég steikist í vítislogum um alla eilífð.
6.Reiði
Sek, ég hef ekki oft misst stjórn á skapi mínu en þegar það gerist þá skal sá sem reiðin beinist að biðja Guð að hjálpa sér.
7.Öfund
Já, ég hef upplifað öfund og sérstaklega afbrýðissemi sek og aftur sek.

7/7 ekki slæmt bara fullt hús!!!

Þar með er það komið á hreint ég er syndug kona og þar sem að ég hef í flestum tilfellum mjög gaman af þessum syndum þá er ég ekkert á leiðinni að bæta ráð mitt.

- Játaði Karen

föstudagur, janúar 27, 2006

There´s no I in Team

Það sáu margir Hellisbúann á sínum tíma og var eitt sem að mér fannst svo Funny cause it´s true var um konur og samvinnu. Hellisbúinn vildi meina að þegar það kemur að því að vinna einhver verk þá fari karlmenn samningaleiðina (ég gerði þetta síðast eða ég skal gera þetta næst) á meðan konur vilja vinna verkið saman. Margar hendur vinna létt verk og allt það. Mér finnst svo mikið til í þessu, ég er að vinna á 2 kvennavinnustöðum og sé þetta í action á hverjum degi. Í deildinni minni vinna 4 karlmenn og 21 kona, og í Baðhúsinu eru við eingöngu stelpur sem skottumst um móttökuna. Ég og konurnar sem ég vinn mest með á hverjum degi sveimum og suðum hver utan í annarri eins og risavaxnar býflugur að hjálpast að við öll verk. Að ógleymdu að sækja kaffi hvor fyrir aðra og dáðst að klippingum, buxum, sjölum og frábærleika hvor annarrar. Ég hef lengi verið á þeirri skoðun að skipta eigi mannkyninu í Homo sapiens masculine og Homo sapiens femine, karlar og konur eru svo ólík á allan hátt að það er ekki alveg rétt að flokka okkur sem sömu dýrategund :)
Karlmenn tala oft um að erfitt sé að skilja konur en það er ekki auðveldara að skilja karlmenn, málið er að við getum bara ekki skilið hvort annað út frá okkar eigin kyni. Women are from Venus and Men from outer space hahahahahaha!!! And that´s the way aha aha I like it!

Let´s bee nice to one another

- Játaði Karen

fimmtudagur, janúar 26, 2006

Lead us not into temptation!

Deliver us from EVIL!

Smá skoðanakönnun - Freistingar á að standast þær eða falla fyrir þeim?

Ég er persónulega á þeirri skoðun að freistingar séu til að standast þær. Ég fæ hrikalega mikið "kick" útúr því að neita mér um eitthvað sem mig langar í, en ég er náttúrulega masókisti og því ekki skrítið að þetta heilli mig. Mér finnst ekkert óþægilegt að fólk sé að borða gotterí nálægt mér þegar ég er í átaki, heldur finnst mér það soldið gott bara, það er gott að vera bitur....í alvörunni.
Dagurinn í gær var uppfullur af freistingum og allir, bókstaflega allir settu sig í hlutverk freistarans. Í vinnunni var verið að dæla í okkur súkkulaði og dóti út af því að hinir og þessir áttu afmæli. "Karen, má ekki bjóða þér mola" sönglaði í eyrunum á mér allan liðlangann daginn. Eftir vinnu kíkti ég aðeins á mömmu og svo í augnablik til Hönnu systur og babyboy. Við Ágúst Smári hreiðruðum um okkur í sófanum að horfa á Disneystundina þegar HANN tók til við að freista mín líka. Hann dró fram box með saltpillum og rétti mér það. "Viltu borða svona", nei takk ástin mín, "jú, þetta er gott" nei Karen vill ekki svona, það er ekki nammidagur. "mamma, er nammidagur" nei kallaði mamma hans úr eldhúsinu. "mamma segir þú mátt fá svona" sagði hann og brosti sínu allra blíðasta, opnaði dósina og veifaði ilmandi saltlakkrísnum framan í mig. En ég lét ekki freistast og leyfði honum það ekki heldur. Þegar ég kom heim tók Óli við hlutverki freistarans og reyndi ég ítrekað að fá hann til að kyssa mig á meðan hann var að borða súkkulaði, því að það er ekki það sama og að svindla.
Það er ótrúlega hressandi að vera svona klikkuð!

Give us a kiss, will ya

- Játaði Karen

miðvikudagur, janúar 25, 2006

Smurfism

Ég er ........ Gáfnastrumpur!!!

Find your inner Smurf!

NOOOOOOOOO!!!! Mest óþolandi strumpurinn!

En þú?

- Játaði Karen

The wonder of me!

Ég gerði stórmerkilega uppgötvun í morgun, ég vaknaði eiturhress kl 6:30, tók upp símann, hringdi í Öldu Lilju og við vorum mættar í gallanum í Þrekhúsið rétt fyrir 7. Síðustu daga er ég búin að vera í stökustu vandræðum með að vakna til að sprikkla á morgnanna. Áður en ég veit af er ég búin að ýta á snooze og leggjast á hina hliðina. Hvað olli því svo að ég spratt á fætur í morgun og er svona glimrandi hress núna????
Ég fór að sofa kl 22:30 í gærkvöldi! Hver hefði trúað því að til að vakna hress á morgnanna þyrfti bara að fara snemma í háttinn á kvöldin. Svona einföld lausn á flóknu vandamáli!
Þegar maður byrjar daginn á því að dæla sig fullan af endorfíni þá verður maður að gæta þess að ofmetnast ekki, til dæmis í dag er ég ótrúlega sæt, mjó og heillandi. Ég þarf í rauninni aldrei að hreyfa mig framar og þarf helst að borða mikið súkkulaði svo ég verði jafn sæt að innan og utan. Gaman að vera ég!

Á meðan ég sat í kálfapressunni og fylgdist með fólkinu á hlaupabrettunum fór ég að hugsa um Woody Allen, það var nefnilega maður með alveg eins skalla og Woody Allen á einu brettinu. Munið þið hvað varð mikið fjaðrafok þegar Woody tók upp ástarsamband við stjúpdóttur sína sem er 35 árum yngri en hann. Þegar Mia Farrow og Woddy Allen hófu sitt samband var Soon-Yi 10 ára gömul. 10 ára!!! Þegar hún var 21 árs fann mamma hennar nektarmyndir af henni í fórum Allen´s og þar með hófst allt fjörið! Meðal annars hatrömm forræðisdeila um börnin 3 sem að Mia og Woody áttu saman. Samkvæmt sálfræðingum barnanna og lögfræðingum Miu þá var það ekki talið gott fyrir börnin að hitta Woody þar sem að erfitt væri fyrir þau að upplifa föður sinn sem KÆRASTA systur sinnar! Ég er bara frekar sammála því! En hvað, núna nokkrum árum seinna eru Soon-Yi og Woody gift og eiga saman 2 dætur og allir búnir að taka PERRAKALLINN Woody í sátt. Mikið hlýtur að vera gott að vera frægur.

- Játaði Karen

þriðjudagur, janúar 24, 2006

Now push it!

Fór í Baðhúsið eftir vinnu í gær að lyfta, og hér eftir fer ég bara í Baðhúsið að lyfta, það er ótrúlega mikill munur að æfa á stöð þar sem allt er úthugsað með konur í huga. Það er líka yfirleitt fámennt í salnum en langar raðir kvenna að bíða eftir brennslutækjunum. Það virðist enn vera fast í konum að það eigi að hanga á hlaupabrettinu til að koma sér í form. Ef að ég þyrfti að velja annað hvort brennslu eða lyftingar þá myndi ég alltaf velja lyftingar. Það eru þær sem að breyta kroppnum á manni. Brennslan minnkar kannski ummálið en til að fá fallegt form á líkamann þá verður að stunda lyftingar af KAPPI!

"Þessi skilaboð voru í boði Frú Ulrich í samstarfi við ISF og EAS, allir að koma svo"

Fyrir þá sem eru ekki þeirrar gæfu aðnjótandi að þekkja mig vel þá er hér smá upplýsingar fyrir ykkur, ég er sjúk í heimildarmyndir! Ég gæti eytt fleiri dögum fyrir framan sjónvarpið að horfa á National Geographic og Discovery. Ég hef alltaf verið svona og því ekki skrítið að ég endaði í mannfræðinni. Hef líka mikinn áhuga á fornleifafræði. Eini gallinn við þessar greinar í dag er að það er búið að finna og ónáða alla frumbyggja og búið að grafa upp flestar spennó fornminjar í heiminum. Hversu magnað hefði það verið að vera með mannfræðingum eins og Malinowski, Leakey, Evans-Pritchard og Mead þegar þau skelltu sér í heimsókn til frumbyggja, fluttu inn á þá og fylgdust með hverju sem þeir tóku sér fyrir hendur. Eða vera með Howard Carter, Dr. Robert Schoch, eða Sir Athur Evans, þegar þeir opnuðu grafhýsi og leystu gáturnar um forn samfélög. Mannfræðingar í dag hafa flestir beint sjónum sínum að sínum eigin samfélögum því að þar er enn af nógu að taka. En það mætti segja að gullöldinni sé löngu lokið.

Óla langar að kaupa hús við sólríkar strendur Kaliforníu sem gæti verið gaman en mig langar frekar að fara til Egyptalands, Mexico, og Afríku að skoða fornminjar og frumbyggja.

Who´s with me??

- Játaði Karen

mánudagur, janúar 23, 2006

Fine and dandy like sour candy!

Hvað er það nákvæmlega sem er svona grautfúlt við mánudaga, er það bara það að helgin var of stutt eða er það málið að maður sér alla vinnuvikuna teygjast á undan manni og það dregur úr manni allann lífsvilja.
En helgin var ósköp notaleg, eftir vinnu á laugardag fórum við Þóra og Hlynur í Kringluna og svo kíktum við Hlynur aðeins að gefa öndunum brauð. Ég dó næstum úr hlátri og velti mér uppúr gæsaskít þegar Hlynur stóð með hóp af gæsum fyrir framan sig, hélt brauðbita hátt á lofti og hvatti gæsirnar til að "hoppa" eftir góðgætinu. Ég grenjaði úr hlátri skammt frá og reyndi í gegnum hláturrokurnar að segja honum að gæsir væru ekki eins og hundar, þær kynnu ekki að hoppa. Þvílíkur grallari! Einnig var hann duglegur að gefa rjúpunum brauð en ég veit ekki hversu hrifinn pabbi hans og föðurfjölskylda yrðu ef að boðið yrði upp á þessar rjúpur á jólunum, þær voru nefnilega meira í ætt við fljúgandi rottur sem þekktar eru sem mávar.
Í tilefni 6 mánaða afmælisins bauð Óli okkur svo út að borða um kvöldið, við fórum á Hereford og þar fékk ég bestu steik sem ég hef bragðað. Æðislegur staður, góð þjónusta, falleg umgjörð og klikkaður matur. Hlynur pantaði sér lambafillet og borðaði svo vel að þjóninn bauð honum upp á ís í eftirrétt. Svo var haldið heim á leið þar sem þeir feðgar skemmtu sér yfir Charlie and the chocolate factory en ég, ég sofnaði rétt fyrir 22 og svaf í tæpa 12 tíma með mallann fullan af steik og rauðvíni. Þvílík partýgella! Á meðan Óli skutlaðist með Hlyn þá tók Karen litla sig til og þreif heimilið. Ég sagði við Óla þegar hann kom til baka að það væri eins og ég og Hlynur byggjum ein þarna. Þegar ég var að þrífa var tvennt sem að varð á vegi mínum, Legó og fullt af því, og svo ca 2 kg af hári úr mér! Miðað við allt hárið sem ég ryksugaði upp þá er furða að ég sé ekki BANSKÖLLÓTT, hvað sem það þýðir.
Af því að það var sunnudagur þá var líka nammidagur og innbyrti ég þvílíkt magn af kóki, pizzu og sælgæti. Þetta er nefnilega mjög sniðugt að taka einn svona borða yfir sig dag. Þetta er hin besta óbeitarmeðferð, ég endaði kvöldið upp í rúmi að horfa á dvd og að farast úr magapínu og ógleði.
Mig langar alls ekkert að borða neitt óhollt í bráðinni.

Jump my pretty, jump I say

- Játaði Karen

laugardagur, janúar 21, 2006

Romantica

Einn þjálfarinn út í vinni kom til mín áðan og dáðist að fallega nýja rauða hárlitnum mínum. "Karen, hárið á þér er einhvern veginn svo rómantískt" sagði hún á meðan við supum á morgunkaffinu. "Takk en gaman!" Hvað í ósköpunum þýðir það að hárið á manni sé rómantískt??? Aldrei heyrt annað eins en er frekar sátt við það að vera með rómantískt hár, ég er nefnilega í svo rómantísku skapi í dag. Við Óli erum búin að vera saman 6 mánuði í dag sem er mjög gaman, ótrúlegt hvað tíminn er fljótur að líða en ég sagði einmitt við hann í gær að mér fyndist við vera búin að vera mikið lengur saman. Það að við erum búin að þekkjast í tæp 14 ár gæti haft eitthvað með það að gera. Áður en við vitum af þá verðum við að halda upp á 40 ára brúðkaupsafmælið okkar og eins og Óli sagði sjálfur verður hann þá með gítar í annarri hendinni og barnabarn í hinni :) alltaf flottur gaur!

Hoppaði á vigtina í morgun og hún heldur áfram að gleðja mig þessa vikuna, alltaf gaman þegar vigtin er vinkona manns. Ég fékk svo uppskrift af fínum heilsunornaseið hjá einni samstarfskonunni minni

750 gr engifer
3 sítrónur
5 l vatn

Sjóða saman í 20 mínútur og drekka 1/2 glas af seyðnum á móti 1 glasi af vatni á morgnanna. Engifer hefur bæði bólgueyðandi og vatnslosandi áhrif og sítrónur eru líka voða "hreinsandi" fyrir kroppinn. Ég bjó til svona í gær en á eftir að smakka á því. En íbúðin ilmaði eins og við hefðum tekið þvílíka hreingerningu þannig að ég býst við að þetta smakkist soldið eins og Ajax. Ummmmmm Ajax!

Ginger Spice

- Játaði Karen

föstudagur, janúar 20, 2006

Cursing the Þorri?

Í dag er bóndadagurinn og fyrsti dagur þorrans, aldrei verið mikill aðdáendi þessa tiltekna tímabils. Umræðurnar í vinnunni snúast mikið um súra punga og annað slíkt. Ég borða ekki neinn mat sem er skemmdur, ég hef það bara fyrir reglu og persónulega vil ég hafa mína punga ferska og ekki af ferfætling. En þannig er ég bara :)
Það er ein skýrasta minning mín úr æsku þegar pabbi hljóp á eftir manni með hákarl að reyna að fá mann til að smakka eða kyssa sig angandi af eitrinu.
Það er því líklegast ekki spennó að fara með mig á þorrablót því að ég borða bara harðfisk, hangikjöt og flatkökur og tek stórann sveig framhjá hinu draslinu. Ég meina, þetta var matur sem að var borðaður af illri nauðsyn því að það var ekki nein önnur leið til að geyma mat og 10/11 Lágmúlanum var ekki opin allan sólarhringinn. Það að núna séum við tilbúin að kaupa þennann SÚRA mat dýrum dómi í næstu verslun er bara frekar fyndið. En við erum svo sem ekki eina þjóðin sem að gerir þetta, tacos og pizzur þykja herramanns matur í dag en þetta var fátækra matur í Mexicó og Ítalíu hér áður fyrr. Ég verð samt að viðurkenna að þetta eru fordómar sem ég hef fyrir þorramat því að ég hef aldrei smakkað hann í raun og veru heldur læt mér nægja lyktina :Þ Við Óli erum samt að fara á eitt stk blót þarnæstu helgi. Ég bíð spennt eins og grjón eftir þeirri helgi því að ég fæ að sjá Óla spila alla helgina og ég er sjúk í það. Það er eitthvað svo svívirðilega skemmtilegt að sjá kærastann sinn á sviði. Er að taka eina aukavakt í sprikklinu um helgina, það er ágætt, vonandi verður bara aðeins minna að gera en síðustu helgi en ég tel það frekar ólíklegt.
En það er ágætt, heldur mér á tánum.
Hlynur bjútíbaby verður svo hjá okkur um helgina og ég bíð spennt eftir að klára vinnudaginn og fara leika við uppáhaldsstrákana mína.

Bon appetit

- Játaði Karen

fimmtudagur, janúar 19, 2006

Sexuality

Horfði á sætu strákana í Queer eye í gær, love those gays I mean guys. Fór í framhaldi af því að hugsa um kynhneigð almennt. Þessi umræða um giftingu og ættleiðingar samkynhneigðra er að gera mig vitlausa. Samkynhneigðir eiga að fá að haga öllu í sínu lífi nákvæmlega eins og við sem erum gagnkynhneigð. Auðvitað eiga þau að fá að gifta sig í kirkju, mér finnst það ekki spurning, nú er ég trúuð og þó að í biblíunni sem ég set í flokk með dæmisögum Esops og öðrum ævintýrum finnist einhver rök gegn giftingu samkynhneigðra þá er mér slétt sama. Guð og Jesú elska okkur öll jafn mikið burtséð frá því hvoru kyninu við löðumst að. Mér finnst það bara ótrúlegt að árið 2006 sé þetta eitthvað deilumál. Kirkjan hefur skipt sér að kynhegðun fólks frá upphafi og er misjafnt hvort að verið er að hvetja til fjölgunar heimsins eða skírlífis. Og ef ég væri í kirkjunnar sporum þá hefði ég frekar áhyggjur af öllum barnaníðingunum sem fela sig í röðum Guðs manna frekar en að eyða tíma í að fordæma fullorðið samkynhneigt fólk sem vill staðfesta ást sína fyrir Guði. Því að það er það sem málið snýst um. Samkynhneigt fólk er líka trúað og þess vegna er ekki rétt að neita þeim um að gifta sig í kirkju. Þegar að ég finn sjálf að læðast að mér ranghugmyndir og fordómar þá er rosa gott að ímynda sér að heimurinn væri á hvolfi. Til dæmis ef að við myndum vakna á morgun og þá væri öllu snúið við og við gagnkynhneigðu værum "öfug", fyllist þið ekki heilagri reiði af tilhugsunni um að vera með skert réttindi og mæta fordómum vegna kynhneigðar ykkar sem að þið getið ekki haft áhrif á eða breytt. Það hafa náttúrulega allir sína skoðun á þessu máli en fyrir mitt leyti þá segi ég God bless us everyone!

- Játaði Karen

miðvikudagur, janúar 18, 2006

Walk on the wild side!

Í staðin fyrir að liggja undir feldi í gær og fela okkur fyrir frostinu, þá fórum við út að ganga í 8 stiga gaddinum. Það var virkilega hressandi í smástund og svo sveið það bara. Við löbbuðum upp Laugaveginn, kíktum í Skífuna, ætluðum svo að fá okkur indverskan en enduðum í bíó í staðin. Fórum í 6 bíó í Regnbogann að sjá fjölskyldumyndina The Hostel! Blóðug morð, limlestingar og full frontal female nudity. Er hægt að biðja um meira. Hafið þið tekið eftir því hvað það er oft sterkt kynferðislegt innihald í hryllingsmyndum. Þetta hefur verið svona síðan ég man ekki hvenær. Munið þið ekki hvað gaurinn sagði í Scream, að þeir sem sofa hjá í hryllingsmyndum deyja! Það er soldið til í þessu, amk er mikið um ber brjóst og kynferðislega spennu í mörgum hryllingsmyndum. Og það á virkilega við í The Hostel. Það er flottur hæfileiki hjá kvikmyndagerðamanni að láta manni líða eins illa og hægt er með vel útfærðum Horror. Eftir myndina þurfti ég smástund til að jafna mig áður en að ég gat hugsað mér að borða kvöldmat. Svo þegar heim var komið þá sá ég þáttinn "How clean is your house" og hann lét mig næstum skila kvöldmatnum. Eins og ég sagði við Óla það er eitt að hafa drasl heima hjá sér en þegar svona skítugt er hjá fólki þá finnst mér það alltaf merki um að eitthvað mikið sé að. Að sjá svo þessa tvo bresku transvestite lookalikes gramsa og þefa af gumsinu var alveg til að gera útaf við mann.

Í dag er sem betur fer frostlaust og ég er alsæl með það, helv... kuldinn er að fara svo með húðina á mér að ég get varla talað um húð lengur því að þetta líkist mun frekar hreistri, ég er hætt að geta notað vaselínið til að koma mér í fötin, núna nota ég það á andlitið á mér. Það dugar ekkert minna til og með þessu áframhaldi verð ég farin að baða mig uppúr ólífuolíu í næstu viku.

- Játaði Karen

þriðjudagur, janúar 17, 2006

Enough already!

Ojbara hvað ég er komin með mikið ógeð af þessum snjó og kulda. Ég er alveg tilbúin fyrir vorið og er að hugsa um að fara til útlanda, finna Heiðlóuna og þvinga vorboðann litla til að drífa sig með vorið hingað á pólinn!! Nenn´essu´gi!!!!
Ég labbaði heim úr vinnunni í gær, hélt að ég hefði bara gott og gaman af því, þegar ég var að stimpla mig út bauð samstarfskona mín sem býr vestur í bæ mér far, en Karen sagði bara "nei takk, ég hef gott af því að fá mér frískt loft". Djö... var það ömurleg hugmynd. Það hefur enginn gott að því að fara út í þetta óbjóðsveður. Ég klöngraðist í gegnum brjálaða skafla og vindurinn beit í allar kinnar. Með ekkert á milli neðri hluta míns og vindsins nema þunnt gerviefni var ekki lengi að bíða þess að ég væri komin með frostbit á lærin og dofin frá mitti og niður. Bjóst við að þurfa að láta aflima mig en þetta bjargaðist. Allt kvöldið fór í að reyna að þiðna, já og að horfa á Gremlins sem er sko alveg pottþétt ekki barnamynd!! Þrátt fyrir að hafa sofið yfir mig í morgun þá fór ég samt í ræktina í, ég hefði reyndar átt að gera ráð fyrir því að það tæki sinn tíma að skafa og keyra í ófærðinni en það er annað mál. Alls staðar voru bílar fastir og spólandi, en ekki ég :) Ég er að sjálfsögðu afskaplega lagin við að keyra í snjó og svo er Toyotan hans Óla þvílíkur fjallabíll. Ekkert að gera í vinnunni frekar en fyrri daginn og ég held að enginn myndi taka eftir því ef ég færi bara inn í fundarherbergi að leggja mig. Mig grunar nefnilega að það sé einhver skógarbjörn í genunum mínum, þegar svona viðrar langar mig að borða yfir mig og sofa í nokkra mánuði. Ohhh hvað það væri sweet!

- Játaði Karen

mánudagur, janúar 16, 2006

You ain´t nothin´but a Hoochie mama

Eftir vinnu á laugardaginn var dagurinn æðislegur, ég fór á æfingu og í ljós, verslaði í matinn fór svo heim og lagði mig. Ummmmmmmm hvað það var gott!
Var svo vakin með kossum seint og síðar meir, held að ég sé með eitthvað Þyrnirósar/ Mjallhvítar heilkenni því að mér finnst ekkert betra en að vera vakin með kossi. Kona sem ég vann með fyrir nokkrum árum síðan átti 4 börn og vakti þau öll á morgnanna með því að leggjast hjá þeim og kyssa þau og knúsa. Ég væri alveg til í svoleiðis og er að upphugsa einhver góð rök til að sannfæra Óla um að vakna alltaf eldsnemma til að vekja mig svona. Er ekki viss um að venjuleg rök mín "en ég er svo sæt" nægi í þessu tilfelli. Eftir að elda og borða góðan mat og horfa á spaugstofuna þá var komið að því að byrja að drekka, Ragga mín var fjarri góðu gamni að þessu sinni en það stoppaði okkur ekki. Þóra og Nonni mættu og við spiluðum og drukkum og ég hef aldrei í lífinu tapað jafn svakalega. Sem sannar að það margborgar sig að svindla. Það var ekkert smáræði af áfengi innbyrgt og heilli flösku af Tópas snöfsum slátrað. Alda Lilja kíkti aðeins við og svo var farið í bæinn. Ógeðslega vorum við skemmtileg, það er alveg með ólíkindum. Fórum inn á nokkra staði og m.a inn á Nasa, þar hafði Skítamórall verið að spila en voru þeir sem betur fer farnir þegar við mættum, dansgólfið var tómt og við réðumst á það og dönsuðum eins og við værum öll nýsloppin af einhverju hæli fyrir snarbilað fólk. Vondu dansarnir ekki gömlu dansarnir dunuðu og var þetta eins flogaveikiskast með erobisku ívafi. Svona var vondu dansakeppnin og við unnum. Þegar ljósin kviknuðu þá sé ég strax kunnuglegt andlit... LITLI BRÓÐIR minn var þarna inni með félögum sínum. Ég fór að spjalla við hann og sagði honum að hann væri ættleiddur því að enginn bróðir minn myndi mæta á ball með Skítamóral. Hann tók þessum fréttum vel, líklegast því að hann hefur verið þakklátur fyrir að við værum ekki skyld. Þegar klukkan var að skríða í 5 var haldið heim á leið og sofið til 14:30 í gær. Lovely!! Sunnu/nammideginum var eytt í sukk og svínarí og þrátt fyrir að líkaminn hafi ítrekað reynt að hafna mér þá var þetta æðislegt!

Vaknaðu Þyrnirós

- Játaði Karen

laugardagur, janúar 14, 2006

Enjoying the quiet majesty of a winters morning

Væminn titill ég veit það, þetta er lína úr einni uppáhalds jólamyndinni minni! Chistmas vacation með Chevy Chase. Þetta líka "And a idiot in a bathrobe emtying a chemical toilet in our sewer" Illa eða ósofin í dag og komin á kaffibolla nr 23 síðan kl 9. Ég svaf í ca 5 tíma í nótt og er núna mætt að hlusta á fullt af konum sprikkla við eurotrash danstónlist síðan 1995. Those were the days og ósjaldan sem mér verður hugsað til þess þegar maður dansaði við þetta drasl á tunglinu í den tid. Bíó/heilsu kvöld í gær, við hjónaleysin fengum fallega gesti til okkar en Þóra mágkona og Nonni mágfrændi tíhíhí komu að borða, drekka og gleðjast. Eftir mat horfðum við á myndina The decent sem að var hreinlega ein sú allra ógeðslegasta sem ég hef séð og voru ósjaldan rekin upp öskur og á tímabili var ég farin að biðja um að horfa frekar á THE RING af öllum óbjóði. Ég var ennþá hálfsmeyk þegar ég mætti svo í morgun í vinnuna og gargaði nokkrum sinnum því að mér brá svo við hitt og þetta. T.d þá kom alveg rosalega hræðilegt hljóð þegar ég kveikti á loftræstingunni, úff hvað ég var hrædd!! Eftir að vera búin að naga neglurnar uppá öxl yfir þessum hryllingi, þá var eiginlega nauðsynlegt að horfa á eitthvað annað til að hætta að hugsa um vibbann, ég stakk upp á einhverri Disney mynd eða einhverju þar sem allir faðmast í lokin. Í staðinn horfðum við á Crash sem var virkilega góð. En fyrir vikið var ég mikið sybbin í morgun. Svo er bílinn eitthvað lemstraður svo að ég ákvað að taka bara bussinn í morgun og mikið var friðsælt og fallegt í Reykjavík kl 8 í morgun. Allt svo hvítt og hljótt! En það breyttist sko þegar ég kom í vinnuna , hér er allt búið að vera vitlaust og konurnar einstaklega ósjálfbjarga eitthvað. Þegar ég ætlaði að opna í morgun þá var lásinn á húsinu FROSIN og ég þurfti að afþýða með dýrmæta líkamshitanum mínum. Í þeirri svipan sem að lásinn lét undan þá kom ein dama og ætlaði sér bara inn hálftíma fyrir opnun " Við opnum ekki fyrr en kl 9" sagði ég og stóð í gættinni, " í alvöru er það eitthvað nýtt" spurði hún særð á svip, ég var ekki á því að falla fyrir þessu og svaraði henni "þetta er nú búið að vera svona síðan 1994"! Spilltu spilltu gellur! Mikið hlakka ég til að klára þennann dag.

Scary ass shit!!

- Játaði Karen

föstudagur, janúar 13, 2006

Time´s a wasting

Enn ein vinnuvikan að verða búin og þessi er búin að vera enn fljótari að líða en sú síðasta. Dagarnir mínir virðast þó lengri því að ég fer fyrr á fætur og geri meira á hverjum degi. Ekki bara að mæta á æfingu, heldur líka að sinna heilsusamlegri matargerð á hverjum degi sem mér finnst ósköp gaman. Veit reyndar ekki hversu gaman það er fyrir Óla að sitja undir því að borða allt þetta heilsudót en hann er að minnsta kosti það skynsamur að hann lætur það vera að kvarta þessi elska.
Ég fékk lánaða bókina Myndin af pabba í gær hjá samstarfskonu minni og las hana á tæpum 3 tímum. Bæði Thelma og Gerður Kristný eiga heiður skilin fyrir hversu vel þær koma þessari sögu frá sér. En þó varð ég á köflum að láta sem að um skáldskap væri að ræða bara til að geta haldið áfram að lesa. Þetta er ekki bók sem maður les sér til ánægju þó að hún sé vel skrifuð. Mér fannst þetta meira eins og að taka meðal sem ég veit að ég verð að taka. Auðvitað eigum við að lesa um þessar systur og um hvað þær gengu í gegnum, ef aðeins til þess að opna augu okkar fyrir því að svona hlutir gerist og að við samfélagið berum ábyrgð gagnvart hvort öðru. Eftir það sem að ég hef lært þá myndi ég aldrei láta það óáreitt ef að ég yrði vitni af eða hefði grun um að barn eða fullorðin yrði fyrir ofbeldi eða áreiti. I am my brothers keeper!

Það eiga allir sem vilja fá stjörnu í bókina hjá Guði og hjá mér að drífa sig að skrá sig í Control Arms andlitssöfnunina.

Óheft vopnasala eykur fátækt og þjáningar í heiminum
Það eru um 639 milljón smávopn (rifflar, skammbyssur, vélbyssur, o.þ.h) í heiminum um þessar mundir. Átta milljón smávopn eru framleidd á ári hverju.
Meðan sala þessara vopna er ekki undir ströngu eftirliti, munu þau verða notuð í vopnuðum átökum, kúgun, í glæpi og við heimilisofbeldi. Ef að stjórnvöld um heim allan taka ekki í taumana munu þau áfram og í auknu mæli verða notuð til að brjóta mannréttindi og auka á eymd samfélaga víða um heim.
Þau samtök sem standa að þessari herferð, Amnesty International, Oxfam (sem eru bresk mannúðarsamtök) og IANSA (alþjóðleg regnhlífasamtök gegn óheftri útbreiðslu smávopna) hafa lengi verið vitni að því ofbeldi og upplausn sem fylgir óheftri vopnasölu, og barist fyrir alþjóðlegum vopnasölusáttmála. En ástandið nú hefur versnað til mikilla muna.

Nauðsynlegt er að bregðast skjótt við. Því hafa þessi samtök hrint af stað herferð fyrir alþjóðlegum vopnasölusáttmála.

Tekið af vef Íslandsdeildar Amnesty International
www.amnesty.is

Með því að skrá ykkur á Control Arms síðuna eruð þið að þrýsta á að settur verði Alþjóðlegur Vopnasölusáttmáli. Þetta tekur enga stund en getur breytt öllu.

Skrá sig HÉR

- Játaði Karen

fimmtudagur, janúar 12, 2006

It´s all greek to me!

Hin æsispennandi saga heldur áfram, ég mætti í morgun í ræktina og það var erfitt skal ég segja ykkur. Í fyrsta lagi þá á að banna konur sem halda að þær séu komnar í saumaklúbb þegar þær eru að lyfta! Ég endaði með að standa dólgslega yfir þeim þangað til að þær föttuðu að bekkpressuvélin er kannski ekki besti staðurinn til að tala saman um útsöluna hjá Tekk vöruhús. Ég vann!!!
Svo hitti ég Darra kunningja minn, þarna stóð ég frekar sybbin og sveitt að pumpa og Darri heilsar mér og segir, "gott að sjá að ég er ekki myglaðastur hérna" OJBARA hver segir svona við mann, ógeðslega var ég sár, en það er allt í lagi því ég sló hann bara létt utan undir með 7.5 kg handlóði...í huganum.
Svo gerðist ég svo fræg að kveikja næstum því í, það er allt helv.... heilsu couscous KUSKINU að kenna ( ekki mér sko), ég var að elda mér þvílíka hollustu í gær, ég var ein í kotinu og var líka eitthvað hálfutan við mig. Ef þið hafið prófað að elda brún grjón þá vitið þið að það tekur 45 mínútur að sjóða kvikindin. Þess vegna keypti ég Couscous sem er tilbúið á 5 mínútum. En svona gerðist þetta, ég var búin að vaska upp EINA tupperware-ið á heimilinu og hafi lagt það frá mér á eina HELLUNA. Svo kveikti ég á eldavélinni til að sjóða vatn í Couskuskið, fékk mér sæti og beið eftir suðunni. En hún kom aldrei, í staðin kom eitthvað skrítin lykt og þegar ég lít á eldavélina þá er ekkert eftir af Tupperware-inu nema LOKIÐ! Hitt hafði bráðnað og bubblaði hressilega í því. PANIC! Með miklum látum tókst mér að bjarga málunum, en núna á ég ekkert tupperware og er komin með Couscous fælni á háu stigi.
En að öðru, það kom ungur maður útí vinnu í gær sem var af mjög svo erlendu bergi brotinn, hann var greyið að vandræðast með einhverja pappíra og gekk illa að hitta á rétta aðila. Ég fór að hugsa hvað það hlýtur að vera erfitt að vera útlendingur, mállaus að leita eftir upplýsingum og þjónustu. Auðvelt skotmark fyrir þá sem að leika sér að því að svíkja og pretta. Að þurfa að treysta á ókunnunga! Sem betur fer er til fólk sem er tilbúið að leggja á sig auka vinnu til að aðstoða þá sem að rata ekki um kerfið. Það breytti algerlega mínu viðhorfi að fara í fordómafræðslu hjá miðstöð nýbúa. Þá fékk maður smjörþefinn af því að vera útlendingur þegar kennarinn talaði við okkur víetnömsku og allar glósur voru á víetnömsku. Ótrúlegt hjálparleysi sem að heltekur mann þegar maður skilur ekkert hvað er í gangi. Svo við skulum vera góð við útlendingana.

Hvíl í frið
Sweet tupperware!

- Játaði Karen

miðvikudagur, janúar 11, 2006

I´m bleeding

Mætti ekki í ræktina í morgun, ógeðslega var ég löt! Ég lá vakandi í 40 mínútur upp í rúmi og hlustaði á vindinn úti og kom mér ekki á fætur. Hjúfraði mig bara upp að Óla og ákvað að sprikkla bara eftir vinnu. Ég mætti hins vegar í blóðflögugjöf í Blóðbankanum svo að morguninn fór ekki alveg til spillis. Haldiði að það hafi ekki komið í ljós að ég er svona ótrúlega tilvalin sem blóðflögugjafi og var komið fram við mig eins og prinsessuna á bauninn í blóðbankanum. Þarna lá ég á þægilegum bekk með kodda undir mér allri og teppi yfir mér, horfði á bíó og drakk kaffi og bruddi kalktöflur (út af andstorknunarefninu) á meðan dælt var úr mér blóði, það sett í skilvindu, blóðflögurnar teknar og restinni dælt aftur í mig. Afskaplega indæll læknir kom og ræddi við mig og sagði hún mér að ég væri með meiri blóðflögur en venjulegt er og að það væri yndislegt! Venjulegur hraustur einstaklingur er með blóðflögur í kringum 250 en ég 349, en fólkið sem kemur til með að fá flögurnar er kannski með blóðflögumagn í
2-3! Ég fékk að sjá blóðvökavann minn og fékk að vita að ég er með lítið sem ekkert kólestról í blóðinu og eftir á fékk ég að sjá blóðflögurnar sem minntu helst á kalda hvítlauksolíu!! Weird! Ég á að mæta aftur eftir 6 vikur og endurtaka leikinn og hætta að gefa venjulegt blóð.
Kíkið HÉR til að sjá hvernig þið getið gerst blóðflögugjafar.
Það er djammhelgi framundan og ég satt best að segja get ekki beðið, ég á alltof mikið af áfengi sem að þarf að drekka og er planið að vera á sneplunum að hrista rumpinn dántán á laugardaginn. Ég er reyndar að vinna fyrri partinn en við ætlum að gera dag úr þessu, Ragga beib ætlar að hitta mig í Baðhúsinu, við ætlum að massa það, kíkja í ljós og dúlla okkur fyrir sukkið. Sem er alltaf stuð! I see ya baby shakin that ass!! Við Óli horfðum á þátt í gær um flóttamenn á Balkanskaganum og greinilega hafði hann meiri áhrif á mig en ég hélt.
Mig dreymdi í nótt að verið var að senda mig til Króatíu þar sem ég átti að giftast einhverjum ókunnugum gaur, ég var sett í "brúðarbaðið" í ógeðslegri sturtu, og var að hugsa allann tímann að Óli myndi koma og stoppa þetta og bjarga mér. Hrikalega óþægilegur draumur!
En hvað segið þið gott?

Ummmmm blóð!

- Játaði Karen

þriðjudagur, janúar 10, 2006

Celebs

Það er löngu vitað að fína og fræga fólkið æfir í Þrekhúsinu. Þegar Óli fer að lyfta þá chillar hann með Bubba og Björk, en þegar ég fer að sprikkla kl 7 á morgnanna þá er það enginn annar en Guðni Ágústsson sem svitnar mér við hlið. Mætti í brennslu í morgun og henti mér á Orbitrekið. Þegar ég var ca hálfnuð tók ég eftir því að Guðni var farinn að glápa frekar mikið á mig. "Jæja Karen, ef þetta nægir ekki til að opna augu þín þá gerir það ekkert. Þú veist hvaða dýri þú ert farin að líkjast ef að Guðni Ágústs er farin að líta þig girndaraugum...... Búkolla mín" Ég herti sprettinn og reyndi að fæla hann frá með því að skvetta á hann svita. En allt kom fyrir ekki og ég var farin að sjá fyrir mér hvernig lífið yrði þegar við værum farin að deita og leiddumst rómantískt um Húsdýragarðinn og fengjum okkur svo tvær með öllu í pylsuvagninum hjá Laugardalslauginni. Þegar ég steig af tækinu þá var ég búin að sætta mig við örlög mín, Óli myndi skilja þetta, ekki satt?? Ég beið eftir að hann vippaði mér í fangið, en hvað var þetta hann rauk bara á Orbitrekið, ég var sem sagt í tækinu HANS og þess vegna var hann að fylgjast með mér, og aumingja ég með stírurnar í augunum, mér missást og girndaraugun voru ætluð tækinu ekki mér.
En svona er lífið!!! 6 tímar eftir af þessum vinnudegi og ég bíð spennt, fer að gefa blóðflögur í fyrsta sinn í fyrramálið og verður gaman að sjá hvernig það gengur fyrir sig, ekkert leiðinlegt heldur að fá að mæta seinna í vinnuna fyrir vikið, alls ekki leiðinlegt. Núna þegar maður hefur tekið upp nýtt Spartneskt líferni þá verður mikið um Tilraunaeldhús á Eggertsgötunni. Síðast þegar ég fór í svona brjálað átak þá borðaði ég leiðinlegasta mat undir sólinni. Það getur enginn lifað þannig til lengdar og því ætla ég að borða hollann og GÓÐANN mat í þetta sinn, með tilheyrandi djöfulgangi í eldhúsinu. Sem er gaman!

Þessari mynd var smellt af okkur Guðna í morgun!

- Játaði Karen

mánudagur, janúar 09, 2006

Buns of...... cotton candy?

Sit í vinnunni skælbrosandi og klappandi sjálfri mér á bakið fyrir dugnað, mætti nefnilega í gymmið í morgun fyrir kl 7! Komin í átak eftir ofát jólanna, ekki misskilja mig ég er sko HOT og passa enn í fötin mín en ég er bara orðin þreytt á að þurfa að smyrja mig með vaselíni og nota skóhorn til að komast í þau. Hahahahaha! Úpps, betra að hlæja ekki það brestur svo í saumunum!!!
Mætti sem sagt með grátstafinn í kverkunum í Baðhúsið í morgun og tók á því. Fékk einmitt hvatinguna sem ég þurfti þegar Massinn gekk upp að mér og spurði hvort að ég væri búin að vera dugleg að mæta og sagðist svo sjá mikinn mun á mér! Well, well, well, það er nefnilega það, eina hreyfingin sem ég er búin að stunda nýlega er að standa upp úr rúminu frá því að borða súkkulaði til að sækja meira súkkulaði. Ef að það er svona grennandi þá er lífið fullkomið! Lenti í algjörum vibba þegar ég var búin að æfa og ætlaði að fara að teygja. Ég gekk inní teygjuherbergi og á STINK vegg!! Þar inn var ein dama sem greinilega hafði let one rip og varð hún svo kindarleg þegar hún sá mig verða græna og ranghvolfa í mér augunum að hún fór að gera teygjunar sína fram á gangi..... ég líka! Ekki alveg til að gleðja mann árla morguns. Á leiðinni heim fór ég svo í "skemmtilegan" umferðaleik sem heitir lendáljósum og ég lenti á hverju einasta rauða ljósi alla leiðina. Mér fannst ég ekkert hafa tekið sérstaklega mikið á því fyrr en ég var komin heim og komst varla upp stigana, ég ætti nú ekki annað eftir að þurfa að standa fyrir utan mjálmandi ámátlegt á Óla til að koma og bera mig upp :) Ekki það að hann hafi ekki bara gaman að því!

Yes yes

- Játaði Karen

miðvikudagur, janúar 04, 2006

Frolicking with Mother Nature

That old lady is a lunatic!

Sæl Móðir Náttúra!
Þetta er í fjórða sinn sem ég skrifa þér til að segja upp áskrift minni af tíðarhringnum þínum. Ég verð að segja að mér finnst þetta vera argasti dónaskapur að þú hefur enn ekki orðið við beiðni minni og hætt að senda mér tíðahringinn með tilheyrandi hormónasveiflum og öðrum fylgihlutum. Það er alltaf sama sagan með ykkur, það er lítið mál að gerast áskrifandi ég þurfti ekki einu sinni að sækja sérstaklega um, en ef maður ætlar að hætta þá er eins og maður ætli ykkur lifandi að drepa!!! Varðandi svarið sem ég fékk við síðasta bréfi sem ég sendi um að ég ætti að hætta að kvarta og njóta þess að umvefja mig kvenleik mínum og finna til þess að ég og alheimurinn erum samantvinnuð í hinum fagra dansi sem er hringrás lífsins. Veistu hvað ég segi við þessum ráðleggingum.... þú skalt taka þessi væmnu ráð þín og troða þeim.... á blað og gefa út ljóðabók geðsjúklingurinn þinn! Það eru kannski til konur sem að njóta þess innilega að busla um í kvenleik sínum og leiðast valhoppandi og hlæjandi á einhverju engi og tralla grípandi stef. En þannig er það ekki hjá mér, mér stekkur vart bros á vör og fátt er jafn fjarri huga mínum og að valhoppa og leiðast. Mér finnst fátt leiðinlegra en að vera ómöguleg í skapinu, grátandi yfir tannkremsauglýsingum og finna mig knúna til að þrífa þangað til ég veit ekki hvað ég heiti. Þannig að nú er mér nóg boðið, ef þú vilt ekki að ég valhoppi hlæjandi á engi með sundurlimað lík þitt í svörtum ruslapoka þá skaltu gera eins og þér er sagt.

Kær kveðja
Miss Ulrich

Kom heim í gær og ákvað að jólin væru búin, tók niður ALLT jóla jóla og þreif þangað til að ekkert var eftir af höndunum á mér nema litlir blóðugir stubbar. Elska að hafa allt svona hreint og fínt og það bergmálar í íbúðinni eftir að allt jóladótið er farið. Tók niður jólatréið með tilheyrandi djöfulgangi, var á endanum að hugsa um að fara með skærin á seríurnar enda allt flækt og grenið spýttist í allar áttir. Fann meira að segja greni í nærfötunum mínum þegar ég baðaði mig eftir stórhreingerninguna. En þetta tókst á endanum með bölvi og ragni og litla jólatréið bíður út á götu eftir því að vera sótt af starfsfólki Reykjavíkurborgar. Fór að hitta Lóu og Röggu til að kveðja Lóu litlu og kom svo heim og fékk mér BJÓR! Dásamlegt!

- Játaði Karen

þriðjudagur, janúar 03, 2006

Good wine, good meat, good God let´s EAT!

Svaka veisla á Skaganum í gær, og eins og alltaf þegar stigið er fæti í Jörundarholtið var boðið upp á þvílíkar kræsingar. Það skyggði pínu á stemminguna að helmingur gestanna sat fastur á leiðinni á Skagann vegna slyss sem hafði orðið og tók langan tíma að koma umferðinni aftur af stað. Sem betur fer var þetta ekki alvarlegt slys og allir gestirnir skiluðu sér að lokum. Ég held að ég geti sagt að núna sé ég búin að hitta hérumbil alla fjölskylduna hans Óla og var mikið fjör í gær. Það var alveg skelfilega erfitt að fara á fætur í morgun, hélt að ég yrði bara ekki eldri, hefði liggur við líka getað sleppt því að mæta þar sem að það er ekki neitt að gera og við farnar að flissa yfir rólegheitunum hér á bæ. Lóan mín að fara aftur til Baunalands á morgun eftir stutt stopp á klakanum en ég held að ég fari örugglega bráðum í heimsókn því að mig dreymdi flugstöð og danska peninga í nótt. Alltaf gaman í Koben! Er það ekki dæmigert að um leið og allir hátíðisdagarnir eru búnir þá byrjar að snjóa, svona var þetta líka í fyrra. Einmitt þegar mér finnst að veturinn eigi bara að vera búin og koma sól og blíða þá byrjar allt draslið og minnir mann á það að það eru ca 4 MÁNUÐIR eftir að þessu. Bróðir hennar mömmu er fluttur til Kanarí og ég held að það sé nauðsynlegt að kíkja aðeins í heimsókn til hans líka. Mér finnst janúar og febrúar vera daunillur handakriki ársins og ég held að það sé nauðsynlegt að reyna að finna sér eitthvað skemmtilegt að gera þessa 2 ömurlegustu mánuði ársins. Uppástungur væru vel þegnar!

- Játaði Karen

mánudagur, janúar 02, 2006

Two thousand and six

Þá er komið nýtt ár, mikið er það nú spennandi, við áttum alveg rosa fínt gamlárs/nýárs. Vorum í mat hjá mömmu á gamlárskvöld og feðgarnir slógu rækilega í gegn hjá fjölskyldu minni að venju, Óli með snilldar grafið lamb sem að allir slefuðu yfir og Hlynur heillaði Ágúst Smára uppúr skónum enda flottur drengur í alla staði. Borðuðum yfir okkur af kalkún og lágum afvelta yfir Skaupinu sem mér fannst bara gott í ár og alveg hægt að hlæja af því. Ég, Óli og Hlynur fórum eftir vinnu hjá mér á gamlársdag að versla flugelda og var þetta í fyrsta sinn sem að ég kaupi eitthvað annað en stjörnuljós fyrir gamlárs. Litli bróður var álíka stórtækur í innkaupunum og við Óli og því var Grenimelurinn eins og litla Beirút eftir skaup. Rosalegt fjör að vera með svona margar risabombur og kökur. Lillarnir voru ekki vitund smeykir við lætin og skemmtu sér konunglega. Uppáhaldið mitt er samt alltaf á miðnætti að kyssa og knúsa alla sem ég elska og yfirleitt verð ég frekar klökk þegar ég minnist gömlu áranna og fagna því nýja. Margt sem getur breytst á stuttum tíma og ég fann það hversu velkomin viðbót Óli og Hlynur eru í fjölskylduna :) Við fórum svo út að borða í gærkvöldi á Caruso sem var ljómandi gott, góður matur, mjög góð þjónusta og vel hægt að mæla með staðnum. Gaman að fara með Hlyn sem var flottur á því og pantaði sér bara steik. Og enn heldur allt átið áfram og við erum að fara í fjölskylduboð hjá Siggu upp á Skaga. Er að fara að hitta fullt af ættingjum Óla í fyrsta sinn og þar á meðal systur hans og systurdóttur og hlakka mikið til. Rosalega held ég að 2006 verði gott og skemmtilegt ár.

- Játaði Karen