Miss Ülrich

- Játaði Karen

miðvikudagur, júní 27, 2007

Mr Sandman...bring me a dream

Þá er sumarið búið í bili, en sólríka gærkvöldið var nýtt í þvílík skemmtilegheit :)

Hittingur heima hjá Þóru og kom Helga með öll börnin með sér og Þóra grillaði æðislegan mat handa okkur og við supum á hvítvíni með og skemmtum okkur. Ótrúlega sumarlegt og skemmtilegt.

Ég fékk svo bróður minn og kærustu hans í heimsókn og átti bara virkilega notalegt kvöld.

En Óli Lokbrá sniðgengur mig ennþá og lá ég og las löngu eftir að feðgarnir voru sofnaðir, sem betur fer er The Gunslinger svo æðisleg að ég vorkenndi mér ekkert að geta ekki sofnað. Takk Atli fyrir að lána mér þessa skemmtilegu bók :)

Þegar ég lagði bókina loks frá mér og kúrði mig upp að Óla þá tók hann í hendina á mér og sagði "Jæja, þá erum komin upp úr göngunum." Ég sagði honum í morgun að hann verði að nýta helgina eitthvað í að sofa því að fólk talar og gengur frekar í svefni þegar það er mjög þreytt, og miðað við næturspjallið á honum síðustu nætur þá veitir honum ekki af því að sofa pínu út :þ

Ég labbaði í vinnuna í morgun og hreinlega verð að lýsa því yfir hversu hamingjusöm ég er með fallega nýja Ipodinn minn, með Rammstein og System of a Down í eyrunum er gönguferð ævintýri líkust!

Sendi Óla sms í gær og spurði hverning honum litist á að eyða sumri í Costa Rica, honum leist bara ágætlega á það og er sumadvöl í Costa Rica sumarið 2009 komin á dagskrá.

Hvers vegna gætu þið spurt ykkur og svarið er einfalt http://www.upeace.org/ Friðarháskóli Sameinuðu Þjóðanna er starfræktur nálægt San José í Costa Rica og þar er boðið uppá sumarnámskeið :) Þar sem að æskilegt er að verðandi þróunarfræðingar eyði amk einni önn erlendis við nám þá er þetta tilvalið alveg hreint.

Spennó :)

Costa Rica ströndin er bara nokkuð hugguleg!!!

- Játaði Karen

þriðjudagur, júní 26, 2007

Cutest ever

Púff búið að vera svo brjálað að gera í vinnunni að ég náði ekki einu sinni að blogga og það gerist ekki oft...

En í tilefni sólarinnar fengum við klukkutíma í mat og ég skellti mér í Baðhúsið og sprikklaði aðeins og heilsaði uppá nokkrar elskur :)

Ótrúlega hressandi að skreppa svona í hádeginu!

Ekki veitti mér annars af því að hressa mig aðeins við því að ég er komin í einhvern snarbilaðan vítahring þar sem ég get ekki sofnað á kvöldin og get ekki vaknað á morgnanna, alveg merkilegt svo er ég sybbin allan daginn þangað til að ég fer í háttinn og þá er ég glaðvöknuð aftur. Fer að plana hluti langt fram í tímann og spenna mig alla upp og til gamans má þess geta að ég er hérumbil búin að pakka fyrir Karabíahafið...í huganum :þ

Óli hins vegar sofnar áður en hann leggst á koddann enda þreyttur þessa dagana, hann er á fullu í byggingarvinnu allan daginn og er orðin svo brúnn að ég þekki hann varla þegar hann kemur heim á daginn. Farið á minna á myndina Jungle Fever ef þið skiljið hvað ég meina hahahaha!

En til að ég útskýri nú fyrirsögnina á þessum ágæta pósti þá var Óli sætastur í heiminum eftir að hann var sofnaður í gær. Ég var í óða önn að hugsa um bikiní, kokteila og pálmatré þegar hann teygir út hægri handlegginn og fer eitthvað að hamast út í loftið.

"Óli hvað er að elskan?"

"Það er eitthvað fast"

"Hvar ertu fastur?" (þegar þarna var komið hélt ég að hann væri fastur í öxlinni eða bakinu)

"Járnið er fast í steypunni"

"Æji ertu að tala upp úr svefni ástin mín?" (Hann á það nefnilega til)

"Nei ÞÚ ert að tala upp úr svefni"

Og með það hélt hann áfram að lúlla, mesta krúttið ever!!!!!

Svona er lífið dásamlegt á Eggertsgötunni...heppin ég :)

- Játaði Karen

mánudagur, júní 25, 2007

I´m baaaaack....

"His teeth felt strange in his head, tiny tombstones set in pink moist earth"
The Gunslinger

Þá er sumarfríið búið í bili...eða þar til 28 september þegar ég fer aftur í frí og What a vacation!!
Ég er strax farin að hlakka sjúklega til!!!
Mætti í vinnuna í morgun með mini útskriftarveislu, sem vakti mikla lukku og þökkuðu samstarfskonur mínar mér vel fyrir að eyðileggja mánudagsmegrunina :þ
Það er bara soldið notalegt að vera komin aftur í vinnuna og munda stimplana og skrifræðið á nýjan leik.
Lenti í því að prentarinn minn hafði fengið einhverja geðsýki á meðan ég var í burtu og þurfti ég að leita aðstoðar tölvugúrúa. Það var beyond skemmtilegt að vera að tala í símann og eftir smá stund var gaurinn í símanum kominn inní tölvuna mína og farinn að vinna á fullu, bendilinn flaug um skjáinn og mér leið eins og tölvan væri bara andsetinn :) Virkilega hressandi eins og Óli myndi segja.
Hef annars lítið að segja lömbin mín... Gleðilegan mánudag bara!

- Játaði Karen

föstudagur, júní 22, 2007

Lovely day

Við Hlynur fengum góðan gest frá Akranesi í morgun, en hún Nína frænka hans Hlyns kom til að eyða með okkur deginum. Við ákváðum að nota tækifærið og gera eitthvað rosa skemmtilegt og lá leiðin fyrst á Árbæjarsafnið og síðan í Laugardalinn, ásamt mömmu og Hönnu systur. Mér finnst alltaf gaman að koma á Árbæjarsafnið og mæli með því að allir kíki þangað.

Frændsystkinin tóku sig vel út á safninu.

Þetta verkstæði var ansi flott og væri ekki leiðinlegt að fara einn rúnt á þessum kagga.

Það er alltaf tími fyrir einn dans

Svo bauðst manni að fá lánuð hljóðfæri og taka lagið með þessum flottu gaurum. Hlynur á Þríhorni og Nína á trompet :)

Nínu fannst gaman að sjá þarna nafn pabba síns á einhverju ævafornu verkfæri

Þar sem eru hestar þar er Nína!

Hlynur að bora í nefið á einum vinnumanninum :þ

Hvað er svo betra en að tjútta aðeins á endurgerð af skemmtistaðnum Hollywood. Hlynur í blússandi sveiflu við lagið YMCA.

Það var svo sem ekki að spyrja að því að þessir litlu dýravinir yrðu snöggir að finna einu dýrin á safninu. Þessi lilti kálfur heillaðu okkur öll uppúr skónum. Og var með SVOOOO mjúka tungu. KRÚTT!!

Eftir það kíktum við í kirkjuna og englabörnin tvö settu sig í viðeigandi stellingar í predikunarstólnum. Séra Nína og Séra Hlynur in da church...

Hvað er betra en að enda ferðina í Árbæjarsafnið með þeysireið í kassabíl.

Í Grasagarðinum gáfum við sársvöngum fuglum brauð, en það var sorglegt að enga andarunga var að sjá neins staðar. Nína hins vegar veiddi sér eina dúfu mér til miklis hryllings og skal tekið fram að hendurnar voru sko þvegnar vel og vandlega eftir að heilsa uppá hana þessa.

Þarna er eins og Nína sé í þann mund að næla sér í andarstegg í matinn, en það var ótrúlegt hvað fuglarnir voru gæfir og krúttlegir.

Búið að vera æðislegur dagur og krakkarnir búnir að skemmta sér og mér vel. Vona að þið eigið jafn ánægjulegan föstudag og ég :)

- Játaði Karen

fimmtudagur, júní 21, 2007

My life in a nutshell...

Langt síðan síðast, en ekki margt búið að gerast...

Eftir að ég var útskrifuð og allt sem því fylgdi afgreitt þá vildi kroppurinn fá hvíld. Hann vildi það svo mikið að ég er búin að eyða sumarfríinu mínu í veikindi. Ógeðslega leiðinlegt en svona er þetta bara stundum. Sem betur fer eigum við núna flakkara sem er fullur af skemmtilegu dóti, og er ég búin að skemmta mér við My name is Earl og Rome í veikindunum. En ég er öll að koma til núna og fór meira að segja út í gær, kíkti á Þjóðminjasafnið með mömmu, systur minni og tveimur frænkum mínum. Það var mjög gaman og náðum við kostulegri mynd af mömmu með hjálm, sverð og skjöld...í víkingaham.

Óli er búinn að vera að vinna á fullu upp á Skaga og hann og Hlynur orðnir kaffibrúnir og sætir. Við Hlynur erum bara að chilla heima í dag og þá er tilvalið að baka kanilsnúða og hafa það gott.
Týpískt samt að um leið og mér batnaði þá fór sólin í felur, en ef hún nennir að skína á morgun þá erum við að hugsa um að kíkja á Árbæjarsafnið, alltaf gaman að kíkja þangað.
Sem minnir mig á það þegar við Óli vorum búin að horfa á The Village og ég reyndi að fá hann til að flytja með mér í Árbæjarsafnið og stofna okkar eigið Village :þ "But Óli you swore an oath never to leave...the VILLAGE"
Jæja ætla að halda áfram að baka.
...by the way 99 dagar í Karíbahafið...

- Játaði Karen

laugardagur, júní 16, 2007

Oh my goodness oh my goodness

Það er augnbliksstund milli stríða, útskriftarveislan fyrir fjölskylduna er búin og við erum að gíra okkur upp fyrir næstu lotu. Kúturinn er kominn í kælingu og við erum búin að fá okkur að borða og erum aðeins að ná andanum. Búið að vera æðislegur dagur, frábær tilfinning að vera útskrifuð og yndislegt að fá alla fjölskylduna til að fagna því með mér. Yndislegt!

Svo er nú ekki leiðinlegt að fá svona mikið af fallegum gjöfum, æðislega skartgripi, allskonar snyrtidót og fallega muni fyrir heimilið, Ipod frá mömmu og systkininum mínum og svo það flottasta í öllum heiminum SIGLING UM KARÍBAHAFIÐ frá Óla!!!!!!!!!

Já þið heyrðuð rétt Vikusigling um KARÍBAHAFIÐ.

Ef þetta er ekki að svakalegasta EVER þá veit ég ekki hvað.

Varð bara að deila þessu með ykkur.

Ykkar

Ungfrú Ulrich

Mannfræðingur

Hér er ég að taka við prófskírteininu mínu alsæl með lífið og tilveruna!

- Játaði Karen

YEEEHAA

Í dag er ég....

MANNFRÆÐINGUR!!

- Játaði Karen

þriðjudagur, júní 12, 2007

Making friends with the enemy...

Það hlaut að koma að því, á svona litlu landi þar sem allir þekkja alla að ég myndi hitta viðhaldið hans Óla. Það endaði nú samt eiginlega með því að hann kynnti okkur bara, enda þegar að aðstæður eru svona þá er það mun skynsamlegra. Eins og ég var búin að bölsótast yfir því hversu miklum tíma Óli var farin að eyða með henni þá kom það mér skemmtilega á óvart hversu vel mér líkaði við hana strax þegar við hittumst. Óli hefur náttúrulega síðustu tvö ár sýnt fram á alveg afbragðs góðan smekk á konum og kannski er það þess vegna sem að viðhaldið sló strax svona í gegn hjá mér. Hún er aðeins eldri en ég bjóst við en engu að síður alveg virkilega hugguleg og ég sá strax hvað það var sem að heillaði Óla við hana. Hún tók ótrúlega vel á móti okkur báðum og mér fannst ég virkilega örugg og velkomin nálægt henni.
Við kíktum aðeins saman í bæinn og svo líka í Nauthólsvíkina og því meiri tíma sem ég eyddi með henni því heillaðari varð ég. Er eiginlega bara soldið mikið skotin í henni sjálf :)
Óli er búin að fá mína blessun yfir samband þeirra og eina skilyrðið sem ég setti var að ég fengi stundum að verða með þeim þegar þau hittast. Óli er alsæll með það og ég held að þetta verði bara allt saman hið besta mál.
Þvílíkur ástarþríhyrningur Ég, Óli og Honda Nighthawk!!!!

- Játaði Karen

mánudagur, júní 11, 2007

Holidaylicious

Það er mánudagur og klukkan er 10:23
Ég er nývöknuð og sit hér í sloppnum hans Óla og nýt þess í botn að vera í sumarfríi. Er nokkuð til sem er yndislegra en að vera í fríi???
Búin að heimta ástina mína úr heljum, mikið var það gott að fá hann heim. Það er ekki spurning að loftið er ferskara, sólin bjartari og lífið betra með Óla.
Svaf eins og ungabarn með elskuna mína mér við hlið, alsæl með lífið og tilveruna.
Núna ætla ég að halda áfram að dúlla mér á sloppnum, jafnvel leggjast aftur upp í rúm og lesa og almennt gera bara það sem mig langar í allan dag því að ég er í fríi.

- Játaði Karen

sunnudagur, júní 10, 2007

Run Run Run

Rólegur dagur í dag, vann í Baðhúsinu í fyrsta sinn í marga mánuði sem var engu að síður bara kósý....
Eftir vinnu bauð Magga mér í heimsókn og ég ákvað að skella mér, þegar ég gekk út um dyrnar hugsaði ég með mér, best að fara í strigaskóm (svo ég geti hlaupið) og úlpu með hettu (svo að ég geti falið á mér hárið). Af hverju ætti ég að hugsa um þetta tvennt þegar ég er á leið að heimsækja vinkonu mína???
Nú af því að kannski þarf ég að labba heim.
Við Magga ætluðum að hittast og fá okkur nokkra bjóra og spjalla sem er alltaf skemmtilegt þegar tækifæri gefst. En þegar leið á nóttina og ég var tilbúin að fara heim þá var engann leigubíl að fá...ég labba bara sagði ég við Möggu en sagði henni að vera tilbúin því að ég hringdi á leiðinni ef ég yrði smeyk.
Nú er ég fullorðin kona og ætti nokkurn veginn að höndla það að ganga 20 mínútna labbið sem er á milli heimila okkar. En ég höndla það samt eiginlega ekki...

Þegar við Magga vorum 18 ára fórum við einar til London...okkur fannst við veraldarvanar og fullorðnar þegar við komum heim frá stórborginni. Tæpri viku eftir að við komum heim var skólaball hjá MH og að sjálfsögðu skellti maður sér. Þar sem að ég var nýkomin heim frá hinni stórhættulegu London var ég afslöppuð og glöð að vera komin heim í öryggið á Íslandi. Eftir ballið ákvað ég að labba heim...þetta var ekki nema ca 15 mínútna labb og lítið mál, ég var heima á Íslandi...hvað gat svo sem gerst???
Þegar ég var hálfnuð heim tók ég eftir manni sem gekk á eftir mér, ég hægði á mér og hleypti honum fram úr og hugsaði ekki meira um hann. Fyrr en hann stökk á mig út úr húsasundi, henti mér upp að bíl og ætlaði sér að koma vilja sínum fram við mig. Hann hafði farið á undan mér og beðið eftir mér í sundinu. Sem betur fer segi ég, að ég hafði fengið mér í glas þetta kvöld og varð ekki hrædd heldur reið. Ég reiddi hnefann til höggs og rétt missti marks en höggið lenti á öxlinni á honum og ég losnaði og tók á rás í átt að húsinu mínu. Hann elti og ég komst með naumindum inn heima hjá mér.
Það var eitt sem ég gerði ekki eftir þessa lífsreynslu og það var...að hringja á lögregluna...og það var eitt sem ég gerði og það var...að ásaka sjálfa mig. Ég var 18 ára í stuttu pilsi og drukkin..auðvitað átti ég þetta skilið...
Enn þá í dag þegar ég er ein á göngu á kvöldin undirbý ég mig og hugsa um skó sem ég get hlaupið í, föt sem ég get falið mig í, ég lít endalaust um öxl og er tortryggin gagnvart hverjum sem ég mæti.
Það eru 12 ár síðan þetta gerðist...

- Játaði Karen

föstudagur, júní 08, 2007

It´s a beautiful day

Gæti það hugsast að sumarið sé loksins komið til Íslands?

Sólin skín, það er logn og þá fá starfsmenn í vinnunni hjá mér tvöfaldan matartíma.

Ég ætla að nota minn langa matartíma til að fara í leikfimi. Ég komst ekki í ræktina í morgun sökum þess að ég komst ekki framúr fyrir harðsperrum. Notalegt að vera með HEIT GLERBROT í öllum vöðvum!!!

Það er aldeilis hvað tíminn ætlar að vera fljótur að líða alveg hreint, strax komin föstudagur og ég að komast í sumarfrí. Fyrsti alvöru sumarfrísdagurinn verður á mánudag en ég ætla að redda einni vakt í Baðhúsinu á morgun. Verður áhugavert að sjá hvernig það gengur tók síðast vakt 9. desember!!

Mér gengur vel að halda mér upptekinni á þessum grasekkju dögum, var boðið í mat til Hafrúnar og fjölskyldu í gær, þar var mér boðið uppá ljúfengan grillmat og Lóritín, enda einn fjölskyldumeðlimurinn loðinn og segir mjá.

Merkilegt hvað kisur laðast sérlega að fólki með ofnæmi :þ

Hringdi svo í mömmu og bauð sjálfri mér í mat í kvöld...ætla reyndar sjálf að sjá alfarið um eldamennskuna en það er bara skemmtilegt.

Nóg að gera :)

Talaði við Óla í gær, búið að vera rosa gaman hjá honum, grillandi hiti og tilheyrandi. Hann var við það að stíga inn á Reef´n´beef þegar ég heyrði í honum og ég var pínu abbó enda er maturinn þar SJÚKUR, ohhhhhh Death by chocolate namm namm namm!!!
Hann er búin að versla hjálma og leðurskálmar þannig að það styttist í að við getum krúsað saman riddarar götunnar, leðurklædd og sæt :)

Ég hlakka ekkert eðlilega til enda er það eitt það skemmtilegasta sem ég veit.

Núna er ég líka með tilbúið leðurdress á mig heima og það eina sem vantar er hjálmurinn.

BRING IT ON!!!!

Hér er smá áminning hversu vel ég tek mig út í leðri YEAH BABY hehehe!

- Játaði Karen

fimmtudagur, júní 07, 2007

The heartwarming story of a grass-widow

Óli er í köben...ég er grasekkja.

Og hvað geri ég þegar ég er grasekkja??? Nú það sama og allar blóðheitar konur gera þegar mennirnir þeirra eru fjarri þeim...

Ég slaga um dauðadrukkin á náttfötunum, drekk vodkann dry og blasta Celine Dion, syng hástöfum með Titanic laginu útbíuð í hori, slefi og tárum. Þess á milli stend ég út á svölum, ríf utan af mér bolinn og garga ÓLI...ÓLI...ÓLIIIIIIIIII

Þú veist, eins og Marlon Brando í Streetcar named desire.

Eins gott að Óli ætlar ekki að vera lengi í burtu...

Annars hefur hann það bara gott í Köben og síðast þegar ég vissi var hann búinn að hitta mömmu sína og Þórð og versla leðurskálmar. Núna er hann vonandi í óða önn að fylla upp í ferðatöskuna með gjöfum handa mér...enda á ég skilið verðlaun fyrir að láta mig hafa fjarveru hans :þ

En fyrir utan mína augljósu vanlíðan vegna ferðalags Óla þá líður mér alveg stórkostlega vel.

Fór beint eftir vinnu í gær í ræktina og skellti mér í Pump með Möggu. Það var verið að kynna nýtt Body Pump prógram, tveir kennarar og brjáluð stemming. Ég var ekki búin að fara í Pump í 5 mánuði þannig að þetta tók ekkert eðlilega á. Það er nokkuð ljóst að tíminn er erfiður þegar að öðrum kennaranum er orðið óglatt af látunum. En ótrúlega hressandi og ég er ætla aftur á morgun. Við Magga eyddum svo kvöldinu saman í að horfa á dvd og hafa það huggó. Skellti mér svo ein í gymmið í morgun, ekki eins gaman án Óla en gerði engu að síður sitt gagn.

Síðasti vinnudagurinn fyrir sumarfrí á morgun...SWEET!!!

Þetta blóm heitir Grasekkja...alein í grasinu alveg eins og ég :þ

- Játaði Karen

þriðjudagur, júní 05, 2007

Girls/boys night out!

Eitt af því sem að ég tel mikilvægt í ástarsamböndum er að fólk geti skemmt sér saman, mér finnst æðislegt að fara út á lífið með Óla og eigum við auðvelt með að skemmta okkur saman. En það er líka mikilvægt að skemmta sér stundum án hvors annars og við turtildúfurnar áttum skemmtilegt kvöld í gær með vinum okkar. Við stelpurnar (Ragga og Magga) fórum á Vegamót þar sem við nutum afbragðs félagsskapar, góðra veitinga og reyklausa loftsins. Það var æði þrefalt húrra fyrir reykingarbanninu, það lengi lifi!

Vegamót er einmitt staður sem hefur verið EITRAÐUR af tóbaksreyk og hlógum við okkur máttlausar þegar rifjuð var upp staðsetning reyklausu borðanna.... innst inni í horni á milli eldhússins og klósettsins!!! Staðurinn var alveg troðinn og greinilegt að reykingarbannið hafði ekki slæm áhrif á viðskiptin og það á mánudegi!

Ég verð nú að deila með ykkur smá gríni og ég er viss um að elskuleg vinkona mín fyrirgefur mér það, en hún Ragga mín er núna rétt rúmum mánuði frá settum degi og er alveg stórglæsilega ólétt. Óléttan hefur ekki aðeins áhrif á kroppinn heldur líka á heilann og sprungum við Magga úr hlátri þegar að Ragga mætti aðeins of seint, settist niður og sagði. " Hæ, afsakið hvað ég er SÆT"

Hún var reyndar alveg rosalega sæt en það var svo sem ekkert til að afsaka hahahaha!

Kvöldið var stórvel heppnað og aðalgrínið var tvímælalaust DAMN BANANAS

Óli tók sig til og fór í pool með Svabba sem þeir gera reglulega og var reyklausa stemmingin ekki alveg að skemmta þeim eins vel og okkur stelpunum. Ég í óendanlegri góðmennsku minni :þ fékk Möggu til að skutla mér til þeirra eftir hittinginn svo að ég gæti skutlað þeim heim því að þeir voru búnir að skutla í sig soldið af bjór. Það var áhugavert að fylgjast með þeim spila nokkra pool leiki en ég er búin að ákveða að pool er eins og skák....ekki fyrir mig!

En engu að síður gaman að horfa á hjá strákunum og sýndu þeir glæsileg tilþrif :)

Við vorum komin heim rétt um miðnætti þreytt og sæl og skrópuðum í leikfimi í morgun, ég vegna harðsperra (sem eru KILLING me) og Óli vegna annara (beer related) krankleika hehehe!

- Játaði Karen

mánudagur, júní 04, 2007

Fools luck

Við Óli erum ótrúlega heppin í lífinu.... í gær var bökuð kaka á Eggertsgötunni sem er svo sem ekki frásögufærandi en eftir að kakan var tekin úr ofninum var brunað á Skagann. Þar höfðum við það huggulegt í kaffiboði og lá svo ekkert á að fara heim og skelltum okkur bara í bíó eftir kaffið. Í hléinu læddist að mér sá illi grunur að eitthvað hefði gleymst þegar við fórum að heiman. Við komum svo loksins heim þegar klukkan var að verða 23 um kvöldið og grunur minn reyndist á rökum reistur...það var kveikt á ofninum....þar var búið að vera kveikt á ofninum í 150 gráðum í 8 klukkutíma!!!

Þannig að við erum mjög svo heppin að íbúðin var ekki brunnin til kaldra kola og við erum líka heppin að rafmagnið er innifalið í leigunni!!!

Annars er ekki laust við að maður sé nú soldið þreyttur eftir helgina, eftir vinnu á föstudag labbaði ég í Kringluna til að versla afmælisgjafir og eins og við þekkjum flest þá er ekkert nema þreytandi að fara í Kringluna. Eftir það var hellt sér í þrif á sameigninni ásamt nágrönnunum, það var stutt púl enda við nokkuð mörg sem að tókum þátt. Grill með tilheyrandi voru verðlaunin fyrir vel unnin störf. Við erum heppin að eiga ágæta nágranna sem eru hressir og skemmtilegir.
Mér tókst hið hérumbil ómögulega og svaf til hádegis á laugardag það var SWEET... fór svo og tók hressilega á því í ræktinni, fór í rosa flott barnaafmæli og fengum svo feðgana Helga og Andra í dinner.

Síðasta vinnuvikan fyrir 2 vikna sumarfríið mitt og rosalega er ég ánægð með það. Það verður YNDISLEGT að komast í smá afslappelsi.

- Játaði Karen

föstudagur, júní 01, 2007

Proud Karen keep on burning

Mikið afskaplega er ég ánægð með sjálfa mig í dag, er búin að fá síðustu einkunnina og það var 8.

Það byrjar vel hjá mér framhaldsnámið í Þróunarfræði ein 7,5 og ein 8.

Nokkuð ljóst að ég er alveg búin að finna mig í þessu námi.

Er alveg skoppandi ánægð með þetta allt saman. Er líka æðislegt hvað kennararnir eru hvetjandi og finnst maður hafa spennandi hugmyndir. Er næstum farin að hlakka til næstu annar!

Mikið er líka ljúft að það séu kominn 1 .júní, alltaf gaman að fá útborgað sérstaklega þegar maður er búinn að vinna mikla yfirvinnu og fær orlofsuppbótina!

Hann Addi litli bróðir minn er 21 árs í dag þessi elska og vonandi á hann alveg yndislegan afmælisdag. Ég ætla að leggja leið mína í Kringluna eftir vinnu og versla eitthvað fallegt handa honum í tilefni dagsins.

Gleðilegan föstudag og hafið það gott um helgina elsku fjörkálfarnir mínir!

- Játaði Karen